Fastastjörnur
Innbyrðis afstaða fastastjarna helst óbreytt, þær mynda fast og óbreytanlegt mynstur sem breytist hvorki yfir nóttina né heldur frá einni nóttu til annarrar. (Við nánari athuganir yfir langan tíma kemur þó í ljós að fastastjörnur færast til á festingunni). Mynstrið er engan veginn fast miðað við jörð eða sjóndeildarhring. Okkur sýnist það snúast eins og stjörnurnar sér allar fastar við eina og sömu kúlu sem snúist um það bil eina umferð á sólahring um fastan ás. Þessi ás liggur um athuganda og hallast frá hápunkti himinsins í átt til hánorðurs. Þar sem þessi ímyndaði ás sker himinkúluna köllum við norðurpól himinsins og er Pólstjarnan nálægt honum nú á dögum.
Hreyfing fastastjarnanna snýst örlítið frá einu kvöldi til annars. T.d. færast Fjósakonurnar u.þ.b. 30o eða 1/12 úr hring til vesturs á hverjum mánuði. Sólin virðist í sífellu hreyfast til austurs, miðað við festinguna, með tiltölulega jöfnum hraða. Sólin hreyfist rangsælis mjög nálægt einum hring á ári, miðað við fastastjörnurnar. Eftir eitt ár er hún sem sagt komin í sama stjörnumerkið aftur eftir eina hringferð um festinguna. Þessi stjörnumerki sem sólin virðist bera við á hringferð sinni mynda svokallaðan dýrahring, sem er svo vinsæll í stjörnuspám. Þessi braut sólar nefnist sólbraut.